ناس كتير قالو ان الالبوم ده اتعمل فى 3 سنين وحاجات كده
اولا عايز اوضح حاجه
مفيش البوم فى الدنيا يتعمل فى 3 سنين... استحاله
الالبوم بيتعمل من3 شهور ل سنه تقريبا
انا قصدى اختيار الاغانى والتسجيل والتوزيع والمكساجوالحوارات دى
انما باقى فتره الغياب لاى مطرب بيبقى فيه حاجات تانيه غير الالبوم
وبعدين اصلا البوم فؤاد منزلش بعد 3 سنين
فؤاد منزل حبيبى يا فى 14/2/2005
و ولانص كلمه فى 11/10/2007
يعنى حسابيا يبقى بينهم سنتين و8 شهور تقريبا... مجازا سنتين ونص
لما نيجى نستعرض نشاط فؤاد خلال الفتره دى
هنلاقى انو بدأ التحضير النهائى للفيلم اول شهر 3/2005
بدا التصوير 23/4/2005
واتصور الفيلم فى 6 اسابيع متصله ثم توقف ثم 4 اسابيع كمان.... وخلال الفتره دى كان فؤاد بيسجل لاغانى الفيلم
وملحقش العرض الصيفى ونزل تقريبا فى اول 11/2005
وقبل تصوير الفيلم باسبوع كان فيه التحضير لتصوير كليب طيب طيب وفعلا ياسر سامى بدا فيه واختار الموديل من بين اكتر من 200 موديل
واتعملت الستورى بورد واتجهز لاول يوم تصوير وبدأو فعلا بس فؤاد وقف يومها واعتقد ان الوقفه دى كانت لمصلحته لانه كان لازم يرجع بحاجه جامده مش تقليديه
بعد الفتره دى فؤاد جمع فرقته اللى كانت متفرقه فى كل مكان وبدأ يحضر لحفلات اللايف ودى تعتبر اهم خطوه لفؤاد فى السنتين اللى فاتو
تحضير الفرقه كان فى شهرين 11 و12
وفى شهر يناير 2006 بدا فؤاد فى حفلات الافراح " ما يسمى بالاوردرات"
وبعدها بدا يشوف العروض اللى بتجيله عشان يخش يعمل اول حفله جماهيريه بعد غياب 5 سنين وبسعر انا شايفه انو خيالى وهوه 120 الف جنيه اللى زاد بعد كده ووصل فى حفله جراند حياهل200 الف
على فكره دا صعب جدا
زى لعيب الكوره اللى يبقى مبيلعبش فتره طويله جدا للاصابه او لان المدرب غضبان عليه او لاى ظروف
ويجى يرجع بس بعد تأهيل وتدريبات وبروفات
رجعلنا فؤاد فى 2/2 /2006
بحفله ولا اروع بعد طول غياب ومحدش كان مصدق ان فؤاد يعمل حفله كده خصوصا بعد الغياب ده كله
بعد كده .. غاب فؤاد وبدأ فتره انا بسميها فتره التحضير الاولى للالبوم
لان كل الاغانى اللى اتعملت الفتره دى منزلتش
اتعرض عليه اغانى كتيره زى متفكرش وهيا اغنيه قويه جدا على فكره ...اشتراها بس مكنش ليها الحظ انها تتسجل
واغنيه ان شاء الله تعودلى بالسلامه
واغنيه خايف نعود اللى اتعرضت عليه ومشترهاش على فكره
واغنيه امان امان اللى كانت عند فؤاد اصلا من ايام شارينى واللى كان موزعها نادر حمدى ومر عليها موزعين كتير
المهم ان فؤاد دخل فى الصيف وعمل 3 حفلات
فور سيزون شرم الشيخ اول 8/2006
المعموره 11/8
لاجون 30/8
وبعد كده دخل رمضان وعمل فى اول جمعه حفله سوليدير وكانت فى 29/9/2006
ووقتها كان بيحضرلنا اغنيه الله اكبر اللى نزلت اخر رمضان تحديدا فى 22/10/2006
وبعد الفتره دى كتير افتكروا ان فؤاد خلاص بقى نازل والكلام ده وانو لو منزلش عيد صغير يبقى عيد كبير
المهم ان فؤاد من نهايه 2006 وتحديدا فى 11/2006 ل اخر 3/2007 ده يعتبر الوقت الفعلى لتحضير البوم فؤاد ..وكان خلال الفتره دى حفله جراند حياه فى 31/12/2006
وحفله دريم بارك 2/2/2007
وجد انو موصلش للى هوه عايزه
والفتره دى الظروف مساعدتوش انو يكثف شغله عشان ينزل فى 4 /2007
لانه تعرض لظروف صعبه من اهمها مرضه ومرض والدته وفعلا فؤش كان تعبان جدا ومحدش كان يعرف كده والكل كان فاكر انو عنده برد ولا حاجه
وحلق زيرو ايامها للحاله النفسيه اللى بيمر بيها
المهم الحكايه عدت على خير
فؤش فوجىء بعد التأجيل اللى محدش يعرف سببه غير فؤش بس واللى قولتلكو عليه دلوقتى
وكان طول الوقت بيقول انو لسه موصلش لحاجه ترضيه
اتفاجىء بالهجوم الشديد من محبيه اللى مكنش ليه لازمه واعتقد ان ناس كتير لما تعرف ان فؤاد فضل اكترمن شهر ونص مايسجلش ولا يدخل استوديو التسجيل عشان تعبان
اكيد هيعزروا فؤاد
تخيلو لما يبقى الاستوديو ملكى وبحضر لالبومى ومش قادر اخش اسجل فيه...احساس مش سهل
المهم اتأجل الالبوم لاول صيف 2007
جت روتانا لعبت لعبتها
حددت 18/6 لعمرو و18/7 لفؤاد
عمرو اتأخر واتسرب ومرت الشركه بحاله اضطرب شديد خصوصا ان عمرو وفؤاد هما الوحيدين اللى بيكسبو الشركه دى
المهم ان فؤاد خلص البومه وانهاه باغنيه حقى غالى يوم الاربع 25/7/2007 ويومها انا كنت موجود عند فؤاد وشوفته وهوه نايم فى الاستوديو عشان يخلص البومه
وكان متعاقد على 4 حفلات جماهيريه فى الصيف منهم المعموره اللى كان معادها 20/7 ثم تأجلت ل 27/7
وبعدها المفروض ينزل الالبوم
وبعدها حفله فى مارينا وحفله فى اسكندريه واخرى بالقاهره فى الاوبرا
يعنى نشاط مكثف
حصلت مشاكل واختلاف فى وجهات النظر بين فؤش وروتانا خصوصا ان فؤاد طلب التأجيل اسبوع واحد عن المعاد المحدد ورروتانا رفضت وبعد كده قرروا ان الالبوم ينزل فى العيد
ومعنى نزول اللبوم فى العيد انو نازل بعد العيد
واعتقد ان فؤاد كان مرتب نفسه على كده
وسلم الماستر يو 18 رمضان حاجه كده وكنت اشارت لكده فى موضوعى " فؤاد ورمضان "
واتصور اكتر من مره بس البوسترات اللى انتو شوفتوها دى خلصت وجهزت واتطبعت فى اقل من اسبوع وقبل نزولها للجمهور بيوم
وكان المفروض ان الالبوم ينزل بعد العيد باسبوع او اتنين
بس للاسف روتانا تفاجىء فؤاد كعادتها وتنزله \قبل الوقفه بيومين وميقدرش فؤاد يعمل كل الترتيبات اللى كان مرتبها لدعايا الالبوم لانو اتزنق
لدرجه ان يوم توزيع الشريط حصل تخبط شديد
لدرجه ان فؤاد هوه اللى راح بنفسه لمقر شركه روتانا بالمهندسن عشان هوه اللى يقوم بالتوزيع
وشهد اليوم ده مهزله توزيعيه من روتانا وده لقله عدد الموزعين
فنلاقى الالبوم بنزل فى المنصوره الساعه 10 وينزل فى اسكندريه الساعه 11 والقاهره لا حس ولا خبر
المهم الحكايه عدت على خير والالبوم باع كتير جدا اكتر ما متوقعله
على فكره فيه حاجات كتير واسرار كتير فى الموضوع ده مكنش ينفع نقولها وقتها
بس اعتقد ده الوقت المناسب لمعرفتها
اه صحيح قبل ما انسى
فيه موضوع لاسرار اغانى الالبوم
وهتعرفوا ازاى فؤاد بيختار الاغنى وبيسجلها ازاى
حتى المكساج بياخد فتره كبيره عشان يظهرلنا باحسن صوره
8/11/2007, 9:56 pm
